Spánarveður og snjór í Ölpunum :D

Jæja þið fjölmörgu dyggu aðdáendur mínir sem látið aldrei í ykkur heyra - eruði tilbúin í nýtt blogg?? ;)

Hér í Ölpunum er veðrið alveg að leika við okkur þessa dagana. Ótrúlega fyndið að liggja úti í sólbaði og vera á barmi þess að kafna úr hita, og horfa svo í kringum sig og sjá að allt er enn snævi þakið  Síðustu dagar eru búnir að vera ótrúlega furðulegir, veðurfarslega séð. Hitastigið hefur meira og minna haldið sér í plús síðustu vikuna eða svo, en samt er veðrið búið að rokka upp og niður eins og það fái borgað fyrir það. Var brjálað rok hérna fyrir nokkrum dögum - sem gerist sko ALDREI hér. Ég varð eiginlega bara hrædd, búin að gleyma hvernig rok hljómaði  ....svo allt í einu kom bara 13 stiga hiti og þvílíkt sumarveður.....og ég nottlega, verandi sá sanni Íslendingur sem ég er, hljóp til í pils og hlýrabol og skrapp í "menningarferð" niðrí Schladming til að sýna mig og sjá aðra og njóta þessa frábæra veðurs. Enn og aftur horfði fólk samt á mig eins og ég væri að misskilja lífið heldur mikið, svo ég gafst fljótlega upp og fór bara aftur heim! Í dag er veðrið samt algjörlega búið að ná nýjum hæðum. Það er örugglega vel yfir 20°hiti úti, glampandi sól og blanka logn. Ég er búin að eyða síðusu svona ca 2 tímum liggjandi flatmaga útá plani að tana - tana - tana  
Þessi dagur er reyndar búinn að vera hálf flippaður frá upphafi til enda. Byrjaði allt á því að ég fór með fullt af fólki að sleðast í gærkvöldi. Enduðum svo á þvílíku djammi niðrí Schladming, þar sem við fórum meðal annars á stippklúbb....og ég vingaðist við einn stripparann, hana Nikki, klárlega nýja besta vinkona mín. Þegar klukkan var orðin 6 gafst ég upp á að bíða eftir þessum partýóðu strákum og ákvað að fara bara heim. Var komin heim um klukkan hálf 7 í morgun - og þá var ég ekki með lykil af húsinu, og örugglega í fyrsta skipti í lífinu voru allar hurðir læstar - týpískt eða...?? Ég brá því á það ráð að fara yfir í gamla húsið (þar sem bed og breakfastið er) og lagði mig þar í klukkutíma. Vaknaði svo klukkan hálf 8 og tók til morgunmat fyrir gestina okkar. Roland ("bróðir" minn) hringdi svo í mig þegar ég var að ljúka við vinnuna mína þar og sagði mér að koma og hitta þá á kaffihúsi hérna rétt hjá - þá var klukkan hálf 10 og þeir s.s. að koma "heim" af djamminu......var frekar fegin að ég hafi ekki beðið eftir þeim, en skundaði af stað að hitta þá. Sátum þar í dágóða stund áður en við komum aftur heim, gölluðum okkur upp og fórum Í FJÓSIÐ!!! Það var sko suddalega awsome, en ég hef aldrei farið með þeim í fjósið áður, en er búin að panta að fá að hjálpa til í sumar.....og það var afar vel tekið í þá hugmynd....og ég er ýkt spennt.....sérstaklega ef ég fæ að klæðast suddalega svala overall gallanum sem ég fékk að vera í í morgun - sem er svona 4 númerum of stór......LOVE IT  Eftir að fjósastörfum lauk (gerði reyndar lítið, annað en að nefna kálfinn sem fæddist í fyrradag - nefndi hana Nadíu....og henni fannst það sko mega töff nafn!!!) kom ég svo heim og bjó til hádegismat, það var "stelpumatatími" í dag þar sem strákarnir fóru að skíða eftir fjósastörf - enn ekkert búnir að fara að sofa nota bene! En í tilefni stelpumatatímans ákvað ég að dúlla aðeins við okkur og gerði rosa góðar brushettur í forrétt og svona - svaka stuð  Eftir að frágangi eftir matartímann lauk lagðist ég svo út í sólbað þar sem ég er búin að liggja þar til núna, en sökum almost köfnunar ákvað ég að koma aðeins inn og kæla mig niður.....og rita nokkrar blogglínur niður á "blað"

Þá vitiði svona næstum því hverja mínútu af deginum mínum so far - líður ykkur ekki betur??

Nú, af öðrum fréttum hugsa ég að Boundless ballið á föstudaginn standi way uppúr öllu öðru! Ég fór s.s. á þetta traditional ball, íklædd splunkunýja og suddalega svala dirndl-inum mínum....og þetta var án gríns eitt skemmtilegasta kvöld ævi minnar!!!! Það var svo ógeðslega gaman að sjá allt þetta fólk dressað upp í traditional klæðnað og svona. Svo var tónlistin alveg ekta austurrísk, og fólk dansandi útum allt.....ég meira að segja dansaði fullt líka, og er alveg fædd í austurríska þjóðdansa held ég  Ofurháa egóið mitt náði svo alveg nýjum hæðum þar sem fólk gerði ekki annað en að hrósa því hvað ég væri glæsileg.....þótti það sko ekkert leiðinlegt  Ég vildi óska að ég gæti íklæðst dirndl alla daga lífsins, þetta átfit er klárlega það mest uppáhalds sem ég hef nokkru sinni fjárfest í!

Svo eru bjórhátíðirnar að fara á fullt skrið um þessar mundir. "Opnunarhátíðin" var haldin á laugardaginn, og héðan í frá verða svo vikulegar bjórhátíðir hérna í Schladming og nágrenni - frekar svalt

Umhverfið hérna er að breytast ótrúlega mikið um þessar mundir, ótrúlega gaman að sjá það - og ég get ekki beðið eftir sumrinu......held að það sé alveg fáránlega fallegt hérna!!! ....og get ekki beðið eftir að sjá almið sem ég verð að vinna í, það eru alltaf allir að tala um hvað sé fallegt þar....og fullt af dýrum og læti!!! Ég sé bara fyrir mér að líf mitt í sumar verði einhvers konar blanda af Heidi og Mjallhvíti, umvafin fjöllum og dýrum  Það var einmitt einhver þáttur í sjónvarpinu í gær þegar við vorum að borða hádegismar, þar sem var verið að tala um öll dýrin sem búa hérna í Ölpunum, og Roland var að útskýra þau öll fyrir mér, og þetta er bara nýr heimur! Fullt af dýrum sem ég hef aldrei séð áður einu sinni, sem búa víst bara hérna í Ölpunum! Svo komst ég líka að því að það eru birnir hérna allt í kring. Varð nú helst til órótt, en Roland og Lisabet lofuðu mér að þeir væru það langt í burtu að ég þyrfi ekkert að hafa neinar áhyggjur.....ótrúlega krípí samt að hugsa til þess að þeir séu bara hérna....og gætu þess vegna bara birst einn daginn OG ÉTIÐ MIG!!!! Svona næstum því

Svo er ég alltaf á leiðinni á skíði, hlýt að láta af því verða e-n daginn  Einn maðurinn sem er á hótelinu okkar næstu 3 vikurnar er búinn að bjóðast til að fara með mig í næstu viku og kenna mér betur, aldrei að vita nema maður þiggji bara það boð, hann er svo skemmtilegur

Ehhh, og hvað er nú meira búið að gerast......

....Manchester vann Liverpool á sunnudaginn!!  Heldur betur kominn tími til!!! Fór niðrí Schladming og horfði á leikinn á eina íþróttapöbbnum í bænum, og það var alveg ágætis stemning, alveg svona 15 manns mættir að horfa - aldrei verið jafn mikið - og allir héldu með Manjú  Úff, svo er Meistaradeildin handan við hornið, og leikur í Munchen 30.mars, Manjú-Bayern.....og ég get fengið miða á leikinn!!!! Vandamálið er bara að fótbolti er voða lítið vinsæll hérna í Austurríki, og sérstaklega hérna í litla, skíðafocused Schladming, svo það er ómögulegt að finna e-n til að fara með mér....og ég er takmarkað að nenna að fara alein  Svo þyrfti ég líka að gista í Munchen þar sem leikurinn er nottlega að kvöldi til, og lestarferðin á milli er alveg 4 tímar - svo ferð á þennan leik myndi aldrei kosta mig undir 250 evrum.....og það er alveg spurning hvort maður megi við því svona rétt fyrir interrail  ......shit hvað ég væri samt til í að fara!!!!!

Eeeeeeen, það er spurning að skella sér aðeins aftur út í sólina áður en hún hverfur í dag.....tútlús muffinstoppar

Rodel, Ísvél og Dirndl....ásamt smá meiru ;)

Jæja bjútíbollurnar mínar, eruði tilbúin í nýtt blogg??  ...ég veit allavegana að Maren er það - ánægð meða

Lífið er alltaf jafn gott hérna uppí fjöllunum, fjallaloftið og allt það  Ég er því miður ekkert búin að fara meira á skíði síðan á námskeiðinu í þarsíðustu viku, en það hlýtur nú að koma að því fyrr eða síðar......helst fyrr samt, svo ég nái því nú áður en snjórinn fer. Það er verið að skipuleggja skíðaferð með öllu staffinu úr búðinni (sem fjölskyldan sem ég vinn hjá á) á næstunni, svo ég fer allavegana að skíða þá - þar sem mér er alltaf boðið með í allt sem búðin gerir  Vonum bara að ég verði ekki búin að glata touchinu by then

Það er búið að vera fullt af allskonar dóti að gera að undanförnu, og rúmlegan hefur minnkað til muna (grenningaróskum mínum til mikillar gleði!!). Fátt sem tekur því svosem að nefna hér samt, bara vinna í búðinni og gestir í húsinu - engir skemmtilegir með krassandi twisti samt - og svona hitt og þetta.
Á laugardaginn fór ég með nokkrum krökkum (og já, ég segi krökkum þar sem þau voru öll fædd 89 eða 90 - klárlega er maður amman í hópnum!) á "Tombólu" sem var haldin hérna niðrí Schladming, til styrktar slökkviliðinu í Schladming. Það tíðkast neflinlega hérna í Schladming/Rohrmoos, sem og öðrum smábæjum í Austurríki, að allt slökkviliðsstarf er unnið í sjálfboðavinnu. Sem sagt meira svona hobbý, svo ertu í þinni vinni líka - hver svo sem hún nú er. Svo það segir sig því sjálft að þeir eru ekki að fá mikinn pening frá ríkinu til að halda starfseminni gangandi, svo þeir standa fyrir allskonar fjáröflunum.....eins og þessari tombólu. Þetta var samt engin tombóla í okkar skilningi á orðinu (krakkar sem labba í hús og spurja "áttu dót á tombólu" og setja svo upp "bás" fyrir utan Nóatún og reyna að þröngva tombólumiðum á 50 kall uppá alla sem ganga framhjá, og ef fólk er heppið getur það unnið hálfbrunnið kerti) nei, þetta var eiginlega meira eins og Bingó. Reyndar VAR þetta Bingó, en það var voða viðkvæmt fyrir viðstöddum ef ég kallaði þetta Bingó, því þetta var Tombóla. Ég var ekki alveg að fatta muninn!.....en anyways.....á tímabili hélt ég að ég myndi láta lífið þarna sökum hægagangs, en á fyrstu 40 mínútunum komu 5 tölur - ÁN GRÍNS!! Þá var það því það voru svo margir að vinna og e-ð krap. Þetta varð þó skárra, og í lok kvöldsins var þetta bara alveg þrææælskemmtilegt ......og ekki versnaði það nú þegar sigurganga mín hófst! Fyrst vann ég voða skemmtilegt uppblásanlegt drasl sem maður á að renna sér niður brekkur á. Það er ferlega pró, með handföngum og allt  En svo stuttu síðar vann ég AÐAL í heiminum - ÍSGERÐARVÉL!!! Þau ykkar sem þekkið mig (sem ég býst svosem fastlega við að séu allir sem lesa þetta, þar sem ég get ekki ímyndað  mér að ókunnugur myndi nenna að lesa skrif mín!) vitið að þá er fátt í heiminum sem ég elska jafn mikið og ís......svo þið getið rétt ímyndað ykkur gleði mína yfir að vera nú búin að eignast ÍSGERÐARVÉL!!! .....svo núna get ég alltaf bara búið mér til ís þegar mig langar í hann, HVERSU SVALT!!! Svo ég er alveg í skýjunum með þennan nýja besta vin minn, sem hefur verið nefndur Lord Napoleon

Fleira skemmtilegt sem ég er búin að gera að undanförnu, jú, ég er búin að fara að sleðast 2 sinnum í þessari viku - alltaf jafn suddalega skemmtilegt!!! Fór á mánudaginn með öllu staffinu af Talbachshenke (veitingahúsinu sem fyrrverandi maður Höllu sem reddaði mér vinnunni, og núverandi kærasti Lisabetar sem ég vinn hjá, á) og í gær ákváðum við voða spontainious að fara á sleða þegar við vorum að halda uppá afmælið hans Thomasar (sem ég þekki samt varla neitt) á Tauernalm (apré ski hyttunni sem við erum alltaf á). Í fyrra skiptið voru fullir krakkabjánar á slopinu, og 2 stelpubeyglur þurftu endilega að klessa á mig, með þeim afleiðingum að ég tognaði í hendinni......sumt fólk sko! Ekkert alvarlega samt, en mér þótti þetta nú algjör óþarfi hjá þeim blessuðum!!! Í gær týndum við svo Thomasi (sem átti afmæli) e-s staðar á brautinni, og hann skilaði sér aldrei alla leið niður! Strákarnir héldu því samt fram að hann hefði farið aðra leið og beint heim til sín - sem mér þykir svosem líklegt þar sem hann skilaði sér allavegana í vinnu í morgun  Ég held samt að við þurfum alvarlega að búa okkur til svona rodel-braut heima á Íslandi, þetta er svo alltof, alltof gaman sko!!!  Ég hafði líka sérstaklega gaman af því í gær þegar við fórum, að ég var uppklædd í starfsmanna uniform og merkt "Planai" í bak og fyrir......eða, á fótum og höfði allavegana  .....en þar sem ég var bar aað koma í afmæli var ég nottlega ekki með græjur til að fara að sleðast, svo strákarnir lánuðu mér allskonar drasl en þeir vinna hérna í fjallinu - eins og svona 90% af íbúum Schladming/Rohrmoos.

Í fyrradag fór ég svo með Lisabet á e-a government skrifstofu hérna þar sem við gengum frá allskonar pappírum sem gerðu mig löglega til búsetu í Austurríki um aldur og ævi ef ég kýs svo   Þetta er e-ð svona thing, að ef maður er lengur en 3 mánuði þarf ég að skrá mig e-ð aukalega eða e-ð.....og þarf aldrei að fara aftur, frekar en ég vil (sem ég nottlega geri....fyrr eða síðar). Mér líður ótrúlega "inn" eftir þetta samt  Til að halda uppá þetta ákváðum við svo að gera okkur hálftíma lengri ferðalag og skreppa til Lizen og fá okkur e-ð krúttlegt að borða og versla pínu. Hún verslaði samt meira en ég þar sem ég er víst að reyna mitt allra, allra besta til að spara!! En ég fann mér voða flottan kjól sem ég ákvað samt að spreða mér í - en þurfti svo ekki að gera því Lisabet ákvað að gefa mér hann í páskagjöf!  ......en páskagjafir tíðkast víst hérna, fyrir börn, og eru meira svona eins og sumargjafir heima - krakkar fá oft sippuband eða e-ð í páskagjöf....nema ég, ég fékk kjól

...og ekki nóg með að ég sé búin að skreyta fataskápinn minn með nýja og flotta kjólnum mínum, heldur verslaði ég mér neflinlega smaaaaáááá meira í fyrradag....nauðsynjavöru samt....málið er neflinlega að ég er að fara á ball á morgun þar sem maður þarf að mæta í Lederhosen og Dirndl.....og þar sem ég átti engan dirndl að þá þurfti ég að sjálfsögðu að kaupa mér slíkan ....en ekki gat ég nú farið að sleppa ða mæta á þetta ball útaf dirndls-leysi....þetta er nú einu sinni góðgerðarball til styrktar skíðaskóla fyrir fötluð börn. Alltof gott málefni til að láta framhjá sér fara  .....plús það, að það er suddalega "ekki inn" að búa í Austurríki og eiga ekki dirndl - ættu helst að vera lög gegn því  Svooo, nú er ég loksins orðin stoltur eigandi voða krúttlegs, blás dirndls með bleikum blómum og bleikri svuntu! Get ekki beeeeðið eftir að nota hann á morgun

En jæja, best að drífa sig út í sólina.....gotta love veðrið í elsku Ölpunum mínum

Alveg að gera sig!!

Já, lífið er sko heldur betur að gera sig hér í Heidi-landi þess vikuna

Sunnudag, mánudag og þriðjudag fór ég á skíðanámskeið og lærði - loksins, loksins - að skíða  Kennarinn minn var sko suddalega ánægður með mig og gaf mér bjór í verðlaun seinni dagana 2, auk þess að tönglast stöðugt á því að ég væri "natural talent" og benda öðrum nemendum hópsins á hæfileika mína - og hversu augljóst það væri að ég hefði æft dans e-n tíman á lífsleiðinni og væri klárlega hörkudansari. Ég sagði honum að sjálfsögðu að ég hefði verið svakalegt talent hér í denn......skil ekki enn að ég hafi ekki unnið nein verðlaun eða neitt
Ég er samt aaaaalveg orðin húkkt eftir þetta námskeið. Get ekki beeeeðið eftir að fara aftur að skíða  ....það verður klárlega gert áður en langt um líður (sagan segir að æfingin skapi meistarann). Síðasta daginn fór´eg meira að segja uppá topp á fjallinu hérna (...og munum nú að ég bý í ölpunum...svo fjöllin hér eru engin Bláfjöll!).....en gat reyndar ekki rennt mér niður aðal brekkuna heldur varð ég að fara auðveldu leiðina  ....ekki alveg orðin nógu sjóuð í bröttu brekkurnar ennþá - en það kemur vonandi.

Svo eru búnar að vera 2 fjölskyldur hérna á hótelinu okkar alla vikuna, svo það er búið að vera svoldið að gera í því öllu saman - sérstaklega þar sem uppþvottavélin er biluð svo ég þarf að handþvo allt upp.....reyndar ekkert að hata það þar sem það lengir vinnudaginn minn töluvert.....enda er ég ekkert að reka á eftir því að koma uppþvottavélinni í lag

Gærdagurinn var svo alveg nálægt því að vera fullkominn. Byrjaði morguninn á að vinna, og það var "minni þrif dagur" í gær, sem þýðir að ég var að vinna örlítið lengur en venjulega daga, og var að  í alveg rúma 4 tíma (rosalegt, I know). Eftir það slappaði ég svo af í smá stund, lagði mig pínu og svona...og fékk svo ógeðslega góðan kínverskan mat í hádeginu. Eftir hádegi lagði ég svo í road trip með Roland og Romana til Salzburgar þar sem fyrirhugað var versl hjá þeim og kjós hjá mér. Skellti mér í hæla og fínt (svona í tilefni af kaupstaðarferðinni) og við brunuðum af stað. Skemmtum okkur þrælvel á leiðinni yfir hinum ýmsu lögum og sögum og stærðfræðidæmum. Þegar til Salzburgar var komið fóru þau svo (ásamt 2 vinum Rolands) í mollið og ég tók bílinn og keyrði inní bæ til að fara á fund með Herr Erik Eibl, ræðismanni Íslands í Salzburg til að kjósa NEI í Icesavekosningunum. Það ferðalag var nú heldur betur ævintýrið, og hefði sannarlega getað endað töluvert verr en raun bar vitni. Í fyrsta lagi tók það góðar 40 MÍNÚTUR að keyra inní miðbæ (ætti að taka svona 10 mínútur, en umferðin var ekki alveg sú skemmtilegasta), og leiddi hún Mandy (GPS tækið) mig í nokkrar ógöngur - en versta var samt þegar hún sagði mér að beygja....sem ég og gerði, en beygði þá 2 sek of snemma og endaði á móti umferð!!!!!!!  Náði þó til allrar lukku að snúa bílnum við hið snarasta og koma mér á rétta götu. Frekar vandræðalegt scare samt!!!  Loksins, loksins, loksins fann ég svo húsnæðið sem innihélt ræðismanninn minn, en þegar þangað kom var allt lok, lok og læs. Ég sætti mig nú heldur betur ekki við þær móttökur og hringdi bjöllunni villt og galið þar til það kom þessi indæla kona og  hleypti mér inn  Þá tók við svona hálftíma langt ferli þar sem indæla konan og Herr Erik Eibl veltust í vafa um hvernig í ósköpunum þessar kosningar ættu að fara fram og hver ætti að fylla hvað út og ég veit ekki hvað og hvað. Að lokum náðu þau þó að finna þetta allt út (kannski ekki beint þau klárustu í pakkanum) og ég gat kosið og haldið af stað á ný. Kom mér þá aftur í Euromarkt (mollið) - með dyggri aðstoð Mandy...hefði aldrei getað þetta án hennar
Þegar í Euromark var komið höfðu samferðarmenn mínir lokið við sitt versl og sátu að snæðingi. Eftir að hafa gripið mér einn McFlurry (þeim til samlætis) hljóp ég því um í ca 20 mínútur og náði að versla smá pínu nauðsynjavörur (maður þurfti nú að vera með fyrst maður var kominn í mollið á annað borð) áður en við brunuðum aftur heim á leið.......nei, afsakið, áður en ÉG brunaði aftur heim á leið. Ég fékk neflinlega að keyra aftur til Schladming og Ó MÆ GOD hvað það var gaman  Hef aldrei keyrt á alvöru hraðbraut áður, en ég er sko fædd í það  Endaði svo daginn á smá leigubílaleik með fullt af ógeðslega skemmtilegum köllum áður en ég kúrði mig uppí rúm með Kebab og meþí.....og spjallaði við Marthe mína á Skype. Sérdeilis ljómandi dagur

Tíminn líður annars alltaf jafn suddalega hratt, og allt í einu er kominn mars!! Seasonið verður búið áður en ég veit af, og interrailið góða verður hafið

En svo ég klári nú söguna af furðulegu fjölskyldunni sem dvaldi hérna í síðustu viku að þá komst ég því miður aldrei fullkomlega til botns í þessu öllu saman. Ákvað að það væri kannski frekar dónalegt að spyrja, svo ég sleppti því  Lambakjötið ofsækir mig samt á Facebook, svo það er aldrei að vita nema ég fái svörin sem mig vantar fyrr eða síðar

En áður en ég skelli mér í að elda hádegismatinn ætla ég að minna ykkur öll á að fara og kjósa á morgun litlu rassálfar. Það er mikilvægt að nýta kosningaréttinn sinn - og það er mikilvægt að sýna heiminum að við erum engar dyramottur, við erum VÍKINGAR og við berjumst til síðasta dropa! Látum ekki vaða yfir okkur á skítugum skónnum - ekkert frekar en Ragnar Reykás forðum daga!!! ...nú eða Ingólfur Arnarson ef þið viljið frekar nota hann sem dæmi

SEGJUM NEI!!!!!!!

Ást, kossar og knús á ykkur

Frekara updeit!

.....NEMA HVAÐ, að ég er ekki frá því að gaurinn sem ég er ekki búin að sjá gelluna kyssa sé í raun faðir lambakjötsins - og þar af leiðandi eiginmaður gellunar! Sem myndi þá líklegast gera kyssigaurinn að kærastanum hennar - SÆLL hvað þetta er áhugavert dæmi! :D

Updeit af furðulegu fjölskyldunni - og fituvæl!

Jújú, ég lofaði ykkur víst updeiti af furðulegu fjölskyldunni um leið og ég kæmist að e-u ;)

Núna er ég búin að standa mig alveg ósköp vel í að bonda við "lambakjötið" (erum meira að segja orðnir Facebook vinir og allt) og hef fengið það staðfest að hann er í raun sonur konunar og mannsinns sem hún kyssti. Þau eru hjón, hann frá Þýskalandi og hún frá Frakklandi og búa þau saman í Frakklandi ásamt téðum syni og 28 ára gamallri dóttur. Öll tala þau reiprennandi frönsku og þýsku, en enskan er ekki alveg uppá marga fiska. Dóttir þeirra sem er ekki með í för er þó alveg fluent í ensku (að sögn drengsins) en foreldrarnir tala varla orð, og lambakjötið talar voða krúttlega fransk-þýsk-ensku....en finnst alveg suddalega gaman að æfa sig og talar því við mig í gríð og erg  Sjálfur er hann 19 ára, en að eigin sögn "mjög þroskaður miðað við aldur" (have I heard that before?). Ég gerðist svo frökk að spurja hann svo í dag hvað væri málið með hinn gaurinn, hvort hann væri frændi hans eða hvað. Mér fannst hann verða svoldið vandræðalegur við þá spurningu og sagði hann vera vin foreldra sinna - og vildi svo ekkert ræða það neitt frekar. Svo mér þykir ekki útilokað mál að hann sé í raun kærasti mömmunar.....sjáum til hvort ég nái að komast að einhverjum frekari upplýsingum á næstu 3 dögum sem þau verða hér. God knows að lambakjötið er það eager to talk to me að það er aldrei að vita nema hann gæti látið e-ð flakka

Lisbeth, konan sem ég vinn og bý hjá, stakk svo uppá því í dag að ég myndi fara á námskeið til að læra að skíða, og ætlar hún að athuga fyrir mig hvort það sé ekki laust e-s staðar á næstunni. Mér finnst það suddalega spennandi tilhugsun og get ekki beðið, ef af verður  Svo tilkynnti hún mér líka í dag að eftir 2 vikur er vika sem verður líklegast ekkert fólk á hótelinu okkar, ef ég skyldi vilja fara e-rt. Svo ég er alvarlega að hugsa um að "leggja land undir fót" og fara í heimsókn til Graz, en það var fólk þaðan hér hjá okkur um daginn og þau buðu mér að koma og vera hjá þeim ef ég vildi e-n tíman  Svo væri nú alltaf gaman að fara til Vínar líka.....sjáum bara til

Annars er ég búin að vera í þvíííílíku nostralgíukasti síðustu daga. Búin að vera að tapa mér yfir gömlum myndum, gömlum minningum og gömlum vinum. Endaði á því að búa til albúm á Facebook í dag með nokkrum gömlum myndum. Það sem ég sit einna helst með eftir þetta mikla kast er sorg yfir því að ég sé ekki jafn grönn lengur og ég var í gamla daga. Ég minnist þess þegar ég var að byrja að fitna og Sólrún systir var alltaf rosa dugleg að benda mér á það - shit hvað ég þoldi hana ekki fyrir að gera það - en shit hvað ég sé eftir því að hafa ekki hlustað á hana.....sjáðu Sólrún, komið svart á hvítu, á veraldarvefinn....ég hefði átt að hlusta á þig!!!  Því þó ég sé ekkert FEIT að þá er ég svo langt frá því að vera jafn grönn og ég var. Ákvað samt að það þýddi lítið að væla það og fara frekar og gera e-ð í því.....en við skulum alveg sjá til hvað ég endist lengi í því. Aldrei verið þekkt fyrir mikinn sjálfsaga, sérstaklega þegar kemur að líkamsrækt og mataræði. Svo eru afsakanirnar líka endalausar, ég ræð til dæmis aldrei hvað er í matinn, og ekki fer ég að afþakka hádegismat með familíunni, það virðast vera hálf helgar stundir hérna hjá þeim - nýja er samt að fá sér alltaf bara einu sinni á diskinn  Svo eru til dæmis enga líkamsræktarstöð að finna hér, og allar götur snævi þaktar og því helst til ómögulegt að fara út að skokka án þess að brjóta nokkuð!!! Ég hef þó ákveðið að byrja "hægt" og píni mig hér með út í a.m.k. klukkutíma langa göngutúra annan hvern dag..... ....at least that's something, right?
En ég vil vara ykkur allar grönnu stúlkur out there við.......passið ykkru að vakna ekki einn daginn og vera orðin 20 kílóum þyngri en þið voruð þegar þið voruð uppá ykkar besta. Sure, það er vel í góðu lagi að hafa smá utaná sér, en öllu má nú ofgera.....hafið það í huga

Svo virðist bara allt vera að gerast heima á Íslandi, fólk að trúlofa sig, annað fólk að fara að búa, allir óléttir og ég veit ekki hvað og hvað. Fólk hefur augljóslega ekki hætt að lifa lífinu þegar ég yfirgaf landið eins og ég var að vonast til! - oh well

Furðulega familían!

Þá er áttunda vika ársins hafin, og allt fullt af Hollendingum hérna í Austurríki. Það er ein fjögra manna fjölskylda sem leggur "hótelið" mitt undir sig þessa vikuna....og er hún nú með meira lagi sérkennileg. Áður en þau komu var einn gaur hérna búinn að vara mig við að þetta væri frekar skrítin fjölskylda þar sem þau væru bara 4 en tækju 4 herbergi, því ekkert þeirra gæti sofið saman í herbergi....og ekki nóg með það heldur væri hér um að ræða einn mann, konuna hans, kærustuna hans og svo 10 ára son hans. Það var þó ekki alveg keisið þegar á hólminn var komið, því það er bara ein kona í hópnum, 2 karlar og ungur (og ferlega myndarlegur) strákur sem er samt nær því að vera tvítugur en 10 ára.....og er með meira af hair products með sér en heilbrigt getur talist.....kannski fær hann útrás fyrir þessu furðulega fjölskyldulífi sínu í hárvörum, ég skal ekki segja!!! Ég er ekki ennþá búin að fá á hreint hvernig staðan er á þessu öllu saman, hvort Martin hafi ruglast í frásögunni og um sé að ræða eina konu, manninn hennar og kærastan hennar eða konu, manninn hennar og bróður hennar/hans eða konu, manninn hennar og barnsföður eða hjón og fjölskylduvin eða hvað. So far hef ég allavegana séð hana kyssa annann manninn, svo nú bíð ég bara spennt eftir að sjá hvort það verði e-ð dúllídúll við hinn gaurinn líka  ....til að gera þetta allt saman svo ENNÞÁ ruglingslegra að þá tala þau enga ensku (nema sonurinn kann e-ð pínu, en augljóslega ekki eins mikið og hann þykist kunna - allavegana ekki ef miða á við viðbrögð hans þegar ég reyni að tala við hann á ensku) en eru fluent í bæði þýsku og frönsku og tala það alveg til skiptis eða í bland eftir því hvað hentar þeim best hverju sinni. Í morgun varð ég meira að segja vitni að samtali móður og sonar (ég held allavegana að þau séu mæðgin....vona að hann sé ekki lambakjötið hennar eða e-ð....iiijúúúúú) þar sem hún talaði þýsku og hann frönsku....undarlegt með meiru!!  Ég lofa samt að láta ykkur vita ef ég kemst til botns í því hvernig þessu fjölskyldulífi er háttað

Það er svosem ekki mikið að frétta frá síðustu skrifum. Ég hef verið einkar dugleg við að iðka nýja tómstundargamanið mitt, sem eru göngutúrar, á síðustu 2 dögum og fór í 2ja tíma göngutúr í gær og rúmlega klukkutíma göngutúr í fyrradag. Hver veit nema ég skelli mér svo í enn einn göngutúrinn í dag  ......maður verður að beita öllum ráðum til að hindra dauða sökum aðgerðarleysis!

Upcoming interrail er svo í stöðugum undirbúning og ég get ekki BEEEEEEÐIÐ eftir að fara á það  Við erum búin að bóka fullt af hostelum og það er allt að smella saman hjá okkur....enda bara 3 mánuðir í brottför - tæpir meira að segja

Ji, svo er þetta blessaða bankamál mitt nú alveg að gera útaf við mig!! Eins og ég sagði frá í síðustu viku þá fór ég með pening í bankann um daginn og ætlaði að leggja inná íslenska reikninginn minn. Það kostaði þrotlausa vinnu í lengri tíma, auk 48 evra að fá það gert - það hófst þó á endanum. Þá tók við 9 daga bið eftir að peningarnir skiluðu sér inná reikninginn minn. Endaði á að ég sendi bankanum mínum heima mail og spurði þá hvernig gæti staðið á því að peningurinn væri ekki að skila sér inná reikninginn minn. Þá kom í ljós að heimski Bank Austria var alltaf að reyna að leggja inná gamla Landsbankann, sem er gjaldþrota, svo það þurfti að hafa samband við þá útaf e-u swift númeri og krap! Þegar það var svo LOKSINS búið og peningurinn kominn inná reikninginn minn og allt virtist ætla að ganga upp tók ég eftir, mér til óummældrar mæðu, að það vantaði 68 evrur uppá það sem ég hafði lagt inn (eftir að hafa borgað 48 evrurnar í kostnað). Brjáluð í fasi skrifaði ég því póst til Bank Austria þar sem ég krafðist skýringa á því að það væri nú búið að draga af mér yfir 100 evrur fyrir það eitt að fá að leggja pening inná reikninginn minn. Það hlyti nú að teljast með öllu óeðlilegt! Enn hef ég ekki fengið neitt svar frá þeim - bölvuðum - fyrir utan skeyti þar sem mér var tjáð að erindi mitt yrði áframsent til viðeigandi gaurs!!!!
Frekar mikið sem ég er orðin pirruð á þessu öllu saman!!!  

Þýskukennslan gengur svona upp og ofan. Er reyndar alveg að fílaða að hafa brengluðu, óenskumælandi fjölskylduna hérna þessa vikuna því annar gaurinn (sem gellan er ekki búin að kyssa að mér sjáandi og ég veit því ekki hvernig fittar inní dæmið) talar NON STOP við mig á þýsku. Ég veit sjaldnast hvað í ósköpunum hann er að fara, en brosi yfirleitt bara....og þegar ég skil ekki það sem hann segir segir hann það bara aftur og aftur þar til ég gef til kynna að ég sé ögn nær því hvað hann var að segja við mig - sem ég þó sjaldnast er  Ég finn samt mikinn mun á milli vikna núna svo ég held í vonina  Er orðin voða dugleg að horfa á þýskt sjónvarp, og er nýbyrjuð á Gilmore girls seríunum mínum aftur, nema núna á þýsku.....ótrúlega spennandi

Ég er samt að verða geðveik á slúðurleysi hérna í fjallinu mínu. Fór út með strákunum í gær og þegar þeir byrjuðu e-ð að tala um að einn gaurinn hefði húkkað sér gellu kvöldið áður fór ég á límingunum af spennu. Ég fann alveg hvernig lifnaði yfir mér allri við tilhugsunina um slúður. Þeir gáti þó ekki séð sóma sinn í því að segja mér alla sólarsöguna - þrátt fyrir að ég hafi næstum farið niðrá hnén og grátbeðið þá um það - svo ég sat uppi með brjálaða slúðurþörf sem enn bíður eftir að verða fóðruð!!! .......Anyone?????

 

Hin alræmda vika 7!!!!

Nú, þar sem í ljós hefur komið að það eru enn nokkrir sem lesa bloggið mitt hef ég ákveðið að hnipra hér niður nokkrar línur og deila áfram með ykkur mínu dásamlega lífi hérna í Rohrmoos Austria

Þessi vika er búin að vera frekar flippuð so far, en núna stendur yfir hin alræmda "7.vika" sem allir eru búnir að tala stanslaust um síðan ég kom. Ekki nóg með að allt sé pakkað af túristum - aðallega frá Danmörku og Bretlandi (ekki að hataða) - heldur er líka karnival í þessari viku - ENN EIN hátíðin (Stars Hollow viðurnefnið fer bráðum að detta uppfyrir þar sem ég held að við sláum þeim út í hátíðhöldum hér!!!). Á sunnudaginn var partý niðrí Schladming fyrir krakka (unglinga) og þá dressuðu allir sig upp í búning og fóru e-ð að skemmta sér niðrí bæ. Náði ekki alveg nákvæmlega hvað var í gangi, en það var e-ð hátíð og ég held að það hafi verið skrúðganga og læti. Á mánudaginn var svo partý hjá eldra fólki og risa ball hérna niðrí Schladming - sem ég fór að sjálfsögðu á.....dressuð sem Rudolf  brjálað fyllerí og hörkustuð....og að sjálfsögðu allir í grímubúningum, og fólk tók búningana mjög alvarlega, sem var mjööög gaman að sjá  Þriðjudagurinn var svo frídagur því þá er aðal dagurinn, man ekki alveg hvað það heitir en e-ð feshen eða e-ð svoleiðis  Allir sem þurftu að vinna í gær unnu í búningum, og þeir sem voru í fríi voru fullir allan daginn!!! Meira að segja tíðkaðist það hérna fyrir nokkrum árum að fólk sem þurfti að vinna var fullt í vinnunni á þessum degi. Hittist í morgunmat áður en það byrjaði í vinnunni og byrjuðu strax að drekka og voru svo bara drekkandi allan daginn. Það er samt hætt á flestum stöðum núna því þetta er svo massív túristavika og túristarnir voru víst ekki alveg að fílaða að allt afgreiðslufólk var drukkið - wonder why  Í dag er svo fiskidagur þar sem fólk borðar fisk í öll mál....sem upphaf af páskaföstunni...sem segir okkur hvað, að páskarnir eru bara 40 days away - WHAT UP!!!! Ég fékk einmitt rosa góðan fisk í matinn núna í hádeginu, alveg dásamlegt
En eins og ég sagði að þá eru ógeðslega mikið af túristum hérna frá Bretlandi og Danmörku, þar sem þessi vika er frívika þar.....og líka hér í Styria, svo hérna er enginn skóli eða neitt þessa vikuna ......sem þýðir að ég sef varla neitt þar sem táningsstúlkan á heimilinu er með svona 5 til 7 sem gista hérna á hverri nóttu, og þær kunna sko heldur betur að halda náttfatapartý....með tilheyrandi öskrum, tónlist og almennum látum til 5 á morgnana!!! - og þau ykkar sem þekkið mig vitið að það þarf nú heldur mikið til að ég geti ekki sofið!!!! Hitti nokkra Breta um daginn sem eru hérna í skólaferð með 40 stráka á aldrinum 11 til 14 ára. Var e-ð að keyra þeim um hérna og það var svo óóóógeðslega gaman að hlusta á þá tala að ég dó næstum því. Ákvörðun var tekin um að næsti áfangastaður (eftir að þýskukunnáttunni verður náð) verður BRETLAND!!! En þar er stefnan meðal annars tekin á að finna draumaprinsinn og flytja hann svo með mér til Íslands....gott plan oder??  ...svo er líka ógeðslega gaman að allri dönskunni sem er hér útum allt þessa vikuna, algjörlega að fílaða

Ég hélt að sjálfsögðu í gömul gildi og hélt bolludaginn hátíðlegan hérna í Rohrmoos á mánudaginn. Bakaði frá mér allt vit, og endaði með ca 60 bollur......sem allar kláruðust (og ég borðaði þær ekki allar....þó ég hafi vissulega borðað fleiri en eina og fleiri en tvær.....eins og skylda ber til á degi þessum!!!). Vinsældir mínar náðu sko nýjum hæðum hérna þennan dag - og voru þær nú alveg í háaum hæðum fyrir  Fólk átti bara ekki aukatekið orð yfir þessu dásamlega bakkelsi sem ég bar á borð fyrir það.

Nú ehhh, ég skrapp til Salzburgar í síðustu viku. Ætlaði að fara og kjósa um Icesave, en þá var ræðismaðurinn ekki við - týpískt!!! Eeen, það þýðir þá bara að ég verði að fara aftur fyrir 6.mars, o jæja  Eeeeelska Salzburg!! Kíkti aðeins í H&M svona while I was there, og verslaði mér smá pínu pons, ekki mikið samt þar sem ég þarf að spara hverja krónu fyrir þetta blessaða interrail sem stefnan er sett á í vor......íííííkkk, svo gaman  Fór líka í banka í Salzburg og lagði pening inná íslenska reikninginn minn (reyna að hjálpa þessum efnahag e-ð og koma með pening inní landið - hehe ) og hvað haldiði nema að ég hafi þurft að borga 48 EVRUR fyrir að fá að millifæra pening inná íslenska reikninginn minn........CRAZY!!! Bjóst alveg við að þurfa að borga e-ð, kannski 10 evrur í mesta lagi - EN 48!!!! ...og það besta er að það eru komnir 8 virkir dagar síðan ég gerði þetta, og peningurinn er ekki enn kominn inná reikninginn minn - what up!!!!

Valentýnusardagurinn var svo síðasta mánudag, og fólk hér alveg að tapa sér yfir honum (enda hátíð, og það er fátt sem skemmtir íbúum Rohrmoos og Schladming meira en hinar alls kyns hátíðir!!), svo ég ákvað að halda mig bara inni þann dag.....enda enginn sem bauð mér á deit   Ég lifði daginn þó af - þökk sé mikilli þrautsegju minni og biturð

Ég er ekkert búin að fara meira á skíði eða bretti þar sem allir hérna eru svo kreisí busy alla daga að enginn hefur tíma til að fara með mig! Ég er samt að spá í að fara að æfa mig í "brekkunni" sem er hérna við hliðiná húsinu mínu. Gefst örugglega upp eftir svona 4 ferðir þar sem ég þarf allaf að labba upp brekkuna aftur, en við sjáum til

"Bróðir" minn hérna hélt uppá tvítugsafmælið sitt í síðustu viku með mega partýi hérna heima. Við vorum 5 stelpur í þessu partýi, og þar af var ég sú eina sem var með make up, sú eina í pilsi og sú eina í hælum.......reynið nú að ímynda ykkur vinsældir mínar í þessu partýi frá því augnabliki sem ég gekk inní herbergið - margfaldið svo með 10 og þá fáiði þær út!!! Það verður nú að viðurkennast að þetta reyndi heldur betur á....svo mikð að ég var farin að sofa klukkan 2!!! Aldrei hefði mér dottið í hug að vinsældir gætu verið svona þreytandi .....krúttlegast af öllu var samt að flestir strákarnir í þessu partýi voru jafnaldrar "bróður" míns - EÐA YNGRI!!! Flestir voru þeir á aldrinum 17 til 20 ára - og aaaaaallir töluðu þeir um það hvað þeir væru þroskaðir og þyrftu því á eldri kærustu að halda....ég get nú ekki beint sagt að ég hafi verið sammála þeirri fullyrðingu neins þeirra, svo enginn þeirra uppskar neitt þrátt fyrir mikið erfiði - greyin  Ég er þó alvarlega að íhuga að halda einskonar námskeið fyrir stelpur hérna í því hvernig á að hafa sig til. Kenna þeim að nota maskara, hæla og pils.....held það veiti ekki af

En jæja, þá eru gelgjurnar á efri hæðinni vaknaðar og byrjaðar að öskra aftur *dæs*.....held ég ætti að koma mér útúr húsi áður en ég missi vitið!

Þar til næst - tuss skottin mín 

Lalalalalala ljúfa

Núúúúúú.......hér í Rohrmoos (*hóst* Stars Hollow *hóst*) er allt voða rólegt þessa dagana. Ástæða: það er Vínarvika - sem sagt, frívika í Vín og nágrenni og því allir þaðan að ferðast um landið.....eða utanlands (sem ég held reyndar að sé algengara hjá Vínarfólki due to the fact hvað þau eru "illa" liðin annarstaðar í Austurríki - þá sérstaklega í Styriu). Það fáa fólk sem er hér í fríi núna er svo allt e-ð fjölskyldufólk, svo skemmst er frá því að segja að lítið er um fjör hér í bæ þessa dagana. Það er nú samt bara ágætt held ég.....maður þarf að safna kröftum fyrir hina alræmdu viku 7, en þá er frí í Styriu og Danmörku og þá er víst allt PAKKAÐ af Styriubúum og Dönum hérna. Ég er sérstaklega spennt fyrir Dönunum og ætla mér sko heldur betur að massa dönskuna á þá  

Þetta nætur slalom sem allir eru búnir að vera að missa sig yfir síðan ég kom var svo á miðvikudaginn í síðustu viku - og það var alveg ágætt. Um 48.000 manns sem voru á hátíðinni og heldur betur þröngt á þingi!! Helst til of þröngt fyrir minn smekk, en á tímabili beið ég bara eftir að verða troðin undir! Það skánaði þó allt þegar við komum að Talbachshenke tjaldinu þar sem við vorum svo allan seinni hluta keppninar  Ölvunin á þessu kvöldi var SVAKALEG!!! Ef ykkur vantar samanburð held ég að Þjóðhátíð í Eyjum sé það sem kemst næst þessu - í bland við unglingadrykkju Menningarnætur og 17.júní mixað saman. Enda held ég að það sé ekkert voðalega mikið fjarri lagi að segja að ég hafi verið eina manneskjan í Schladming og nágrenni sem var EKKI þunn daginn eftir.....enda drakk ég ekki dropa

Handboldinn er að sjálfsögðu búinn að owna sjónvarpið mitt að undanförnu (loksins að risastóri flatskjárinn sem ég er með í herberginu mínu fékk að njóta sín) þar sem ég fékk ekki miða á neina fleiri leiki  og verð ég nú að segja að ég uni bara alveg suddalega sátt við 3ja sætið  Strákarnir stóðu sig tuddavel og nú er ég jafnvel enn stoltari af uppruna mínum en áður - ekki það að ég hafi e-ð þurft á því að halda  Hefði nú samt alveg viljað sjá Króata jarða þessa Frakka, eeeeeen það skiptir svosem ekki öllu

Að öðru leyti er fyrirhuguð ferð til Salzburgar eftir helgi - líklegast á mánudaginn - þar sem planlögð er ferð í H&M þar sem pils og peysa verða keypt (ekki búin að geta hætt að hugsa um hvorugt síðan ég sá það í H&M í Linz og keypti það ekki......eins gott að bæði sé ennþá til!!!!) ásamt því sem leitað verður hátt og lágt að afmælisgjöf handa "bróður" mínum hérna úti og síðast en ekki síst ræðismaður Íslands í Salzburg heimsóttur og kastað á hann eins og einu Icesave atkvæði
Svo er líka fyrirhuguð ferð á INTERRAIL BABY!!!!! Núna í maí-júní með Möggu, Magga, Krissa og Sigga (Kristjönu og Sigrúnu). Við Margrét erum búnar að vera on fire síðustu daga við að panta hostel og skipuleggja hlutina nánar (þar sem við erum svo sjóaðar þá höfum við sjálfskipað okkur sem skipulagningsnefnd þessarar ferðar) og þetta verður sko einum of AWSOME (eins og unglingarnir myndu segja ). Planið er svohljóðandi:
París
- hugsa reyndar að ég sleppi því) - Belgía - Amsterdam - Þýskaland (Innsbrug og Munchen allavegana, jafnvel e-ð meira
Austurríki
- ætla að koma með þau hingað til Schladming og sýna þeim allt og svo ætlum við að skoða e-ð fleira, Salzburg, jafnvel Graz og e-ð
Ítalía
-tökum Feneyjar og e-ð og verðum svo í Mílan 6.-9. júní þar sem við förum á MUSE TÓNLEIKA BABY!!!!!
"Júgóslavía"
- ætlum að keyra gömlu Júgóslavíu frá Ítalíu og niður til Grikklands og stoppa á nokkrum stöðum - læra að sörfa hjá vini mínum í Króatíu og svona
Grikkland
- eyðum síðustu dögunum á dásamlega Grikklandi áður en ég flýg svo aftur hingað til Austurríkis og þau hin fara e-ð öll í sitthvora áttina

Spennandi??? JÁJÁJÁJÁJÁ

Suddalega busy!

Jæja, þá er ég loksins farin að upplifa "upptekin" tilfinninguna á nýjan leik. Síðasta vika er búin að vera ótrúleag busy.....og ég er sko alveg að fíla það! Held samt að það sé því miður ekki e-ð sem ég má venjast  En við skulum sjá til - ég reyni allavegana

Setti fullt af myndum inná Facebook í gær sem þið verðið öll að skoða - þær eru geggjaðar!!!

Annars er svosem fátt að frétta, svona þannig. Engar gígantískar breytingar á lífi mínu - engin börn á leiðini, ekkert brúðkaup í aðsigi - ekki einu sinni ást í aðsigi! En lífið er alveg ljómandi gott hérna í Austurríki. Búin að fara 1 sinni á bretti og 1 sinni á skíði so far, og telst vera afbragðsgóður nemandi  Svo nú bíð ég bara spennt eftir að fleiri nenni að fara með mig svo ég geti nú æft mig og orðið suddalega góð. Ég get neflinlega ekki farið ein, því ég þarf að hafa e-n sem getur gripið mig þegar ég missi stjórn á skíðunum og bruna villt áfram í átt að næsta skurði eða e-ð!!.....og það er líka gott að hafa e-n til að hjálpa sér að standa upp þegar maður fellur kylliflatur í miðri brekku (ekki það að það hafi gerst eða neitt......*hóst*).

Tölvan mín er búin að vera með endalaus leiðindi, enda búin að vera á barmi dauða síðustu 2 árin eða svo......svo ég ákvað að notfæra mér heimsóknina mína til Snorra í Steyr um daginn og keypti mér nýja tölvu :D Hún er rosa sæt og fín og grá og létt og lítil og nett - og heitir Rúfus! So far er ég að elska hana, eins gott að hún haldi áfram að standa fyrir sínu
En já, ég fór s.s. í heimsókn til Snorra vinar míns í Steyr núna fyrir helgi. Fór reyndar fyrst til Linz á EM í handbolta, hitti hann þar og fór svo með honum til Steyr þar sem ég var í heimsókn í einn dag áður en hann og Eva, vinkona hans, komu með mér hingað til Schladming og skíðuðu alla helgina. Það var svo viðbjóðslega gaman á leiknum að ég á eiginlega ekki orð til að lýsa því!!! Fórum s.s. á leik Íslands og Austurríkis. Allur leikurinn var æðislegur. Bauð uppá allt sem góður leikur þarf að hafa. Frábæra takta, brjálaða stemmningu (í íslensku aðdáendunum) og þvílíka spennu. Lokaniðurstaðan var þó því miður ekki alveg jafn góð  .....en við töpuðum leiknum niðrí jafntefli á síðustu sekúndunni (okey, ég hef ekki hugmynd um hvernig maður skrifar þetta orð, þar sem maður skrifar alltaf bara sek. help someone!!!)......eins og þið vitið líklegast flest. Það var ótrúlegt að sjá þetta. Ég trúði því baa engan vegin að þetta hafði gerst. Á þessar síðustu sek meira að segja á video og er búin að horfa á það aftur og aftur.....bara skil þetta ekki!!! Eeeeen, úrslitin komu þó ekki að sök og við unnum riðilinn samt sem áður - GO ÍSLAND!!!!
Miðinn okkar gilti svo á leik Danmerkur og Serbíu líka, svo við ákváðum að staldra við og horfa á þann leik líka. Ekki var stemmningin minni þar, en það var ÓGEÐSLEGA mikið af Dönum þarna!!! Það hafa verið svona 40 - 50 Íslendingar staddir á okkar leik, svo við vorum varla prósentutala af áhorfendunum - þó við höfum vissulega látið mest í okkur heyra - en það voru Danir ÚTUM ALLT!!! Við studdum þá að sjálfsögðu, enda frændur vorir með meiru....og vorum sko ekki ósátt við þá ákvörðun, enda tóku þeir þessa Serba alveg í bráðskemmtilegum leik

Í síðustu viku var svo loftbelgjahátíð hérna í Schladming og það voru loftbelgir útum allt. Það var ógeðslega svalt að sjá þá, en ég fór því miður ekki í einn slíkan.......enda kostaði ferðin 250 evrur á manninn......sem mér fannst nú helst til of mikið  Eeeeen, hátíðin var ljómandi skemmtileg - rosa mikið í anda Stars Hollow, en það er svosem ekkert verra!!

 Nú ehhh, annars veit ég svosem ekki hvað meira ég get sagt ykkur í augnablikinu. Er líka eiginlega alltof þreytt til að finna uppá meiru, svo ég ætla að taka mér powernap í eins og klukkutíma áður en ég þarf að fara aftur að vinna (sem ég er alveg í alvöru að gera þessa dagana - JEY, JEY, JEY!!!)

Það kom þá að því....

....að ég fékk "farðu að blogga" komment - og þá geri ég það að sjálfsögðu Það er neflinlega svo leiðinlegt að blogga þegar öllum virðist vera alveg sama - en ein sál getur dimmu í dagsljós breytt með þessum 3 litlu orðum!!

Það er allt frábært að frétta úr Austurríki, verður bara betra með hverjum deginum Ég er meira að segja farin að kynnast stelpum og læti - ef það eru ekki tíðindi!!! 

Það er farið að vera fólk á hótelinu eiginlega alltaf, svo ég er loksins farin að vinna af e-i alvöru. Yfirleitt er ég samt að vinna frá svona korter yfir 7 á morgnana og til svona 10. Þá er ég búin að gefa öllum morgunmat og þrífa öll herbergin. Ég hef samt verið að fara svoldið mikið í búðina eftir hádegi og vinna þar. Það er ótrúlega gaman, en ég get samt voða takmarkað gert þar sem ég tala ekki þýsku og veit ekkert um skíði eða skíðatengda hluti. Ég er samt alltaf að læra meira og meira og það er farið að vera smaaaaaáááá hjálp í mér - sem er gott

Svo er félagslífið líka alveg að kippa við sér. Ég fór meira að segja ein í partý á laugardaginn (þegar ég segi ein þá meina ég nottlega án öryggisteppisins míns - líka nefnt Roland - eða "bróðir" minn). Hitti stelpu þegar við vorum á rodeln (sleðast) í síðustu viku.....good things always happen while rodeln (nema þegar maður klessir á tré og deyr næstum því)....sem er kærasta vinar hans Rolands. Við náðum svona líka suddalega vel saman, en þá tilkynnir hún mér að hún sé að fara að flytja til Ástralíu í næstu viku (flutti þangað í gær)...hversu týpískt!!! En hún var að halda kveðjupartý á laugardaginn og bauð nýju bestu vinkonu sinni (mér) að sjálfsögðu í það. Roland lenti svo í því að þurfa að vinna svo hann komst ekki í partýið. Ég bakkaði þá alveg og sagðist ekkert ætla að fara heldur þar sem ég þekkti engan - en þá sagði hann að það ætti nú ekki að vera mikið mál fyrir mig þar sem ég ætti svo ótrúlega auðvelt með að kynnast fólki og væri svo opin og skemmtileg. Með þessari setningu vann hann alveg í "uppáhalds" - leiknum. Gott að kunna að sleikja fólk upp. Hann fyllti mig sjálfsöryggi og trausti með þessum orðum sínum (sem voru samt ekki alveg þessi orð þar sem hann kann nottlega ekki íslensku) og sendi mig svo aleina í partýið. OG VITI MENN, eignaðist vini Ég ákvað að gera þetta að stelpukvöldi og einbeita mér að því að kynnast STELPUM, sem ég og gerði Náði samt best saman við stelpu sem býr í Vín (týpískt - eina sem var þarna sem býr ekki hér í Schladming).

Svo erum við bara alltaf að rodeln-ast. Það er svo fáránlega gaman að ég held alltaf að ég sé að deyja úr fjöri. EEEEEENNNN, það jafnast þó ekki á við að fara á snjósleða (vélsleða), en ég gerði það í fyrrakvöld og Ó MÆ GOD hvað það var gaman. Fórum s.s. í hyttu hérna uppí Rohrmoos og hittum þar fullt af fólki. Þar eru alltaf saman komnir strákarnir sem vinna í fjallinu á kvöldin (þurfa nottlega að hittast í bjór og svona fyrir vinnu). Ég veit ekki alveg hvað það er nákvæmlega sem þeir gera, en þeir fara alltaf uppúr miðnætti og keyra upp fjallið á sleðunum sínum. NEMA HVAÐ að í fyrrakvöld var mér boðið í sleðatúr. Ég hélt án gríns að ég myndi deyja úr skemmtun. Held þetta sé alveg eitt það skemmtilegasta sem ég hef á ævinni gert. Get ekki beðið eftir næstu ferð (sem verður klárlega þar sem þeir eru allir svo viðbjóðslega skotnir í mér - ha, hógvær, ég.....einmitt!!).

Í gærkvöldi fórum við svo í næsta bæ að horfa á night-slalom (eða e-ð svoleiðis). Það var ýkt gaman - sérstaklega fyrir mig því ég var svo ógeðslega vel klædd að ég var ekki að krókna úr kulda eins og samferðarmenn mínir - FACE!!! Það er samt aðal night-slalomið hérna í Schladming eftir 2 vikur. Þá eru karlarnir að keppa (þetta voru konurnar, og það nenna voða fáir að horfa á þær) en þá er reiknað með BRJÁLUÐUM fjölda fólks hingað. Minnir að þau hafi talað um að það séu yfirleitt um 40.000 manns hérna á þessu - en það skal tekið fram að ég bý í 4000 manna bæ!!!! Allar gistiaðstöður allstaðar eru lööööngu uppbókaðar og fólk sofandi á dýnum útum allan bæ. Ég hlakka ýkt til að fara á það, sérstaklega þar sem við eigum bláan passa þar, en ekki rauðan - sem þýðir að við erum á stað þar sem við actually gætum séð e-ð......og hitt fræga

Ég er enn að bíða eftir að ná að mastera þýskuna. Á frekar langt í land með það ennþá, en er samt farin að skilja smá!!! Heimilisfólkið hérna er líka orðið rosa duglegt að tala við mig á þýsku, svo það hjálpar - þau eru búin að vera að gera það í viku núna (segja s.s. hlutina á þýsku fyrst og ég reyni að skilja þá og svo segja þau þá á ensku) og ég finn strax rosa mikinn mun Svo er stefnt á fyrstu skíðakennsluna á föstudaginn - boy o boy segi ég bara!!!

Annars er ég búin að vera ótrúlega ódugleg með myndavélina síðustu daga, en stefni á betrumbætur í þeim málefnum!!!

Knús á ykkur öll dúkkurnar mínar!! - farin á date við Gilmore girls